Egisto Sarnelli A ‘nfrascata Testo

‘Mmiez’ê ffronne,

‘mmiez’ê ffronne d’ ‘a ‘Nfrascata1,

ce sta na casarella prufumata;

chien’ ‘e sciure, chien’ ‘e rose avvellutate

addó’ se ferma ‘o sole p’ ‘a guardá…

Addó’ se ferma ‘o sole p’ ‘a guardá…

E na figliola cu duje uocchie nire,

s’affaccia, tutt’ ‘e ssere, a vintun’ore…

E ‘o core mio se fa na cammenata,

tutt’ ‘e ssere,

‘mmiez’ê ffronne d’ ‘a ‘Nfrascata…

Raggio ‘e luna,

raggio ‘e luna ‘nnargentato,

tu comme si’ felice e affurtunato:

quanno, ‘a sera, ‘sta fenesta s’è appannata,

te miette ‘e faccefronte p’ ‘a guardá…

Te miette ‘e faccefronte p’ ‘a guardá…

E quanno ‘sta figliola s’addurmenta,

tu trase a ll’intrasatto, e ‘a vase ‘nfronte…

E po’ te firme ccá, tutt’ ‘a nuttata,

pazzianno

‘mmiez’ê ffronne d’ ‘a ‘Nfrascata.

Ll’aggio ditto,

ll’aggio ditto a ‘sta figliola:

“Chi è bella comm’a vuje nun pò stá sola:

‘Sta vucchella tène ‘addore d’ ‘e vviole

e io desse tutt’ ‘a vita p’ ‘a vasá…

E io desse tutt’ ‘a vita p’ ‘a vasà…”

E tengo pronto giá nu lietto ‘e sposa,

cu duje cuscine, fatte ‘e fronne ‘e rose…

Ce manca na cuperta arricamata…

e ‘a facimmo

cu sti ffronne d’ ‘a ‘nfrascata!